काठमाडौँ । नेपाल कम्युनिष्ट पार्टी (एमाले) का अध्यक्ष केपी शर्मा ओलीले आगामी निर्वाचनको वातावरण तयार गर्न आवश्यक रहेकोमा जोड दिएका छन्।
पार्टीको ११औं राष्ट्रिय महाधिवेशनमा परिचालित स्वयंसेवकहरूलाई प्रमाणपत्र प्रदान गर्दै अध्यक्ष ओलीले शान्तिपूर्ण वातावरणमा मात्रै निर्वाचन सम्पन्न गर्न सकिने बताए। उनले भने, “यदि वातावरण शान्तिपूर्ण हुन्छ भने हाम्रो दल चुनावमा सहभागी हुनेछ।”
उनले थपे, “त्रास र असुरक्षाकाबीच निर्वाचनको वातावरण नबन्ने हो।” जेनजी आन्दोलनको क्रममा सुरक्षाकर्मीबाट लुटिएका हतियार र जेलबाट भागेका व्यक्तिहरूले थप सुरक्षा चुनौती थपेको कुरा उल्लेख गर्दै उनले शान्तिपूर्ण निर्वाचनको वातावरण बनाउन सरकारको दायित्व रहेको स्पष्ट गरे।
राष्ट्रपति रामचन्द्र पौडेलले आह्वान गरेको बैठकमा पनि ओलीले आफूहरू चुनावका विरुद्ध नभइ प्रतिगमनविरोधीमा दृढ रहेको उल्लेख गर्दै, “प्रतिनिधि सभा पुनःस्थापना गरिनु पर्छ, र यदि फागुन २१ मा चुनाव गर्नुपर्छ भने त्यसका लागि वातावरण बनाउनुपर्ने छ,” भने।
अध्यक्ष ओलीले भदौ २३ गते सुरक्षाकर्मीले सरकारी सम्पत्ति र आत्मरक्षाका लागि परिस्थितिप्रधान निर्णय गरेका कारण तत्कालीन प्रधानमन्त्री र गृहमन्त्रीलाई बयानका लागि बोलाउनु उचित नहुने बताएका छन्। उनले भने, “सुरक्षाकर्मीलाई परिस्थिति अनुसार निर्णय गर्ने अधिकार छ, र यसका लागि राजनीतिक नेतृत्वलाई बयानमा बोलाउनु तर्कसंगत र कानुनी हिसाबले सही छैन।”
प्रकाशित: बिहिबार, पौष १०, २०८२
सम्बन्धित खवर
