काठमाडौँ । इन्डोनेसियाको जकार्ता-योग्यकार्ता राजमार्गमा सोमबार बिहान एक भीषण दुर्घटना भएको छ, जसमा १६ जनाको मृत्यु भएको छ। स्थानीय एजेन्सीका प्रमुख बुडियोनोका अनुसार, जकार्ताबाट योग्यकार्तातर्फ गइरहेको एक कोच बस उच्च गतिमा यात्रा गर्दै एक मोडमा पुग्दा सडकको अवरोधसँग ठोक्किएको थियो, जसका कारण बस अनियन्त्रित भइ पल्टिएको हो।
बुडियोनोले जारी गरेको विज्ञप्तिमा भने, “हामीले घटनास्थलबाट ३४ जनालाई सुरक्षित रूपमा बाहिर निकाल्न सफल भएका छौँ।” दुर्घटनामा १५ जनालाई घटनास्थलमै मृत घोषित गरिएको थियो, भने एक गम्भीर घाइतेको उपचारका क्रममा अस्पतालमा मृत्यु भएको छ। घाइतेलाई उपचारका लागि सेमरङ सहरका विभिन्न अस्पतालहरूमा पठाइएको छ।
इन्डोनेसियामा यस प्रकारका यातायात दुर्घटनाहरू प्रायः हुने गरेका छन्। सवारी साधनहरूको पुरानो अवस्था, मर्मतसम्भारको कमी, र सडक नियमहरूको उल्लङ्घन जस्ता कारणहरूलाई दुर्घटनाका मुख्य कारण मानिन्छ। यसअघि सन् २०२४ मा ईद अल-फितर पर्वका दौरान व्यस्त राजमार्गमा एक बस र कारको ठोक्किँदा १२ जनाको मृत्यु भएको थियो। सन् २०१९ मा सुमात्रा द्वीपको पश्चिमी भागमा बस खोलामा खस्दा ३५ जनाले ज्यान गुमाएका थिए।
प्रकाशित: सोमबार, पौष ०७, २०८२
