काठमाडौँ । नेपाल कम्युनिष्ट पार्टी (एमाले) को ११औं महाधिवेशनबाट ३०१ सदस्यीय केन्द्रीय कमिटीको संरचना तय गरिएको छ, जसमा प्रत्येक भूगोल र क्षेत्रबाट ४० वर्ष मुनिका युवालाई अनिवार्य समावेश गर्ने निर्णय गरिएको छ। आज सुरु भएको बन्दसत्रमा पारित प्रस्तावअनुसार, केन्द्रीय कमिटीमा महिला, युवा, आदिवासी–जनजाति, मधेसी, दलित, थारु, मुस्लिम, श्रमिक, अपाङ्गता भएका व्यक्तिहरू र पिछडिएको क्षेत्रबाट समावेशी प्रतिनिधित्व सुनिश्चित गरिएको छ।
नयाँ संरचनाअनुसार, केन्द्रीय कमिटीमा १९ पदाधिकारी हुनेछन्, जसमा १ अध्यक्ष, ५ उपाध्यक्ष, १ महासचिव, ३ उपमहासचिव र ९ सचिव समावेश गरिएका छन्। वरिष्ठ उपाध्यक्षको पद अब हटाइएको छ।
प्रदेशगत प्रतिनिधित्वअनुसार, उपत्यकासहित सबै आठ प्रदेशबाट ७२ जना केन्द्रीय सदस्य निर्वाचित हुनेछन्। प्रत्येक प्रदेशबाट नौ जनाको प्रतिनिधित्व रहनेछ, जसमा पाँच जना खुला, तीन जना महिला र एक जना युवा समावेश हुनेछन्। खुला कोटाबाट १२५ जना केन्द्रीय सदस्य चयन हुनेछन्, जसमा ७१ जना खुला, ५२ जना महिला र दुई जना युवा समावेश गरिएका छन्।
समावेशी संरचनाअन्तर्गत आदिवासी–जनजातिबाट २५ जना (खुला १५, महिला आठ, युवा २), मधेसीबाट १९ जना (खुला ११, महिला छ, युवा दुई), दलितबाट १२ जना (खुल्ला सात, महिला चार, युवा एक), थारु समुदायबाट आठ जना (खुला पाँच, महिला तीन), मुस्लिम समुदायबाट पाँच जना (खुला चार, महिला एक) प्रवासतर्फ भारतबाट एक र अन्य देशबाट एक गरी दुई जना, श्रमिकबाट तीन जना (खुला दुई, महिला एक), अपाङ्गता भएका व्यक्तिबाट एक जना, पिछडिएको क्षेत्रबाट दुई जना (खुला एक, महिला एक) सम्पर्क समन्वय कमिटीबाट दुई जना (खुला एक, महिला एक) रहने छ ।
प्रकाशित: आइतबार, मंसिर २८, २०८२
सम्बन्धित खवर
