काठमाडौँ । नेपाल प्रिमियर लिग (एनपीएल) को फाइनलमा स्थान बनाउँदा विराटनगर किंग्सले लुम्बिनी लायन्सबाट १३५ रनको लक्ष्य पाएको छ। आज कीर्तिपुरस्थित त्रिवि क्रिकेट रंगशालामा टस हारेर ब्याटिङ गर्न आएको लुम्बिनी लायन्सले निर्धारित २० ओभरमा ८ विकेट गुमाएर १३४ रन बनाएको हो।
लुम्बिनीका ओपनर डार्सी शर्टले सर्वाधिक ४५ रन बनाउँदै ४१ बलमा तीन चौका र एक छक्का प्रहार गरे। कप्तान रोहितकुमार पौडेलले ३० बलमा दुई चौका र दुई छक्कासहित ३४ रन जोडे। यी दुईले ८-१ को स्थितीबाट ६९ रनको साझेदारी गर्दै लुम्बिनीको इनिङ सम्हालेका थिए। तर, ११.२ ओभरमा ७७-२ को स्थितीमा रहेका लुम्बिनीले २७ रन मात्र जोड्न सके र १६ ओभरमा १०४-६ को स्थितीमा पुगेर समग्रमा १३४ रन बनाएको हो।
निरोसान डिकवेलाले २२ बलमा चार चौका प्रहार गर्दै २९ रन बनाएका थिए भने रुबेन ट्रम्पेलमनले ११ रन बनाए। लुम्बिनीका अन्य ब्याटरहरू दोहोरो अंकमा पनि पुग्न सकेनन्। सन्दीप जोरा र जेजे स्मिथले ‘डक’ (नौलको स्कोर नगरी आउट) भएका थिए, भने दीलिप नाथ र दीनेश अधिकारी समान एक रनमा पभेलियन फर्किए।
विराटनगर किंग्सका स्पिनर सुवास भण्डारीले ३ विकेट लिए, चार ओभरमा ३.५० को इकोनोमी रेट राख्दै १४ रन मात्र खर्चिए। प्रतिश जिसीले पनि चार ओभरमा २७ रन खर्चेर तीन विकेट लिए, जबकि कप्तान सन्दीप लामिछानले चार ओभरमा १८ रन खर्चेर दुई विकेट झारे।
आजको खेलमा विजेता टिमले उपाधिका लागि सुदूरपश्चिम रोयल्ससँग प्रतिस्पर्धा गर्नेछ, जो साविक उपविजेता पनि हो। विराटनगरले लिग चरणमा दोस्रो स्थान प्राप्त गर्दै प्लेअफमा स्थान बनाएको थियो, जबकि लुम्बिनी चौथो स्थानमा रहँदै प्लेअफमा पुगेको हो।
प्रतियोगिताको फाइनल खेल मंसिर २७ गते हुनेछ।
प्रकाशित: बिहिबार, मंसिर २५, २०८२
सम्बन्धित खवर
