काठमाडौँ । नेपाल कम्युनिष्ट पार्टी (एमाले)ले आसन्न ११औं राष्ट्रिय महाधिवेशनमा नेतृत्व चयनका लागि विद्युतीय भोटिङ मेसिन प्रयोग गर्ने निर्णय गरेको छ। एमालेका उपमहासचिव प्रदीप ज्ञवालीले नेतृत्व चयन प्रक्रिया छिटो र प्रभावकारी बनाउन यसपटक पनि विद्युतीय भोटिङ मेसिन प्रयोग गर्ने बताए। यसअघि १०औं राष्ट्रिय महाधिवेशनमा पनि पार्टीले विद्युतीय भोटिङ मेसिनको प्रयोग गरेको थियो।
ज्ञवालीले भने, “हामीले नेतृत्व चयनका लागि विद्युतीय भोटिङ मेसिन प्रयोग गर्ने निर्णय गरेका छौँ। टेण्डर आव्हान भइसकेको छ र चाँडै नै कुन कम्पनीले यो प्रक्रिया सञ्चालन गर्ने भन्ने निर्णय हुनेछ।”
महाधिवेशनले यसपटक १५ पदाधिकारीसहित २५१ सदस्यीय केन्द्रीय कमिटी चयन गर्नेछ। यस अघि सम्पन्न दोस्रो विधान महाधिवेशनमा पारित संशोधनले केन्द्रीय कमिटीको सङ्ख्या घटाएको थियो।
महाधिवेशनमा करिब २,२०० प्रतिनिधिको सहभागिता हुने अपेक्षा गरिएको छ। महाधिवेशन २०७८ मङ्सिर २७ देखि २९ गतेसम्म काठमाडौंमा हुने छ, र बन्दसत्र भने भृकुटीमण्डपमा हुनेछ।
प्रकाशित: बिहिबार, मंसिर १८, २०८२
सम्बन्धित खवर
